Goe Narene Amel...

Koda Keru (cerita pendek)

Goe Narene Amel, Amelia...

Wia rema kai pana ne bereun weka di kantor. Mai seba kopi menu di warkop. Heru ne kebare tou. Nae ata Bugis-Makassar alape. Nae noto lime, leta kenalan.

"Nare goen Amelia. Maje goe Amel hena," nae gepa goe nempe. Goe kode gekaje. Pe onek gere kode mei, "Biasa ne'e pe kemomu rete leta kenalan. Beli nae keberwae nete leta kenalan di." hehehe

Amel gepami, nae ata Enrekang (Bugis-Enrekang) alape. Kuliah di Unhas, Jurusan Ekonomi. Goe kode sambo koda. Goe gepaso, nare goe Hamba. Nae digekaja hena. Kame ruame ditobole holo koda mete menu kopi.

Goe bele dihape, jam 10-30 kae. Lare di warkop ae pe, oto honda juga bai sama rame halamu kae. Keregit pe nae leta permisi. Mau balika ne lango ne'e. Goe beleso, nae tele tas yang ne wiliso mokodo kete, taoro di meja lolo. Ne gute hape di tas ne'e ono.

"Ama hamba e, rata moen pe tou ge mae-mela. goe mau foto ne moe pe, bisa le take?," nae gepa goe nempe. Kode keregit hena. Goe juga herane, padahal goe bai artis hala tapi ata leta foto ne goe?

Nae maje bereun goen tou. Bereun goe nipe nae ata Selayar alape. Narene Ophik. Nare ne'e yang benere pe taufik, ara di kantor pe kame weka majaro mi ophik.

"Ama Ophik e, moe tolong gute gambar (foto) kame ruame ama Hamba kiaku. bisa le take?," nae leta ophik nempe. Goe bele ophik digekaja.

"ehheem.. ehhem," Opik sengaja kebehera. Sebenerne'e nae sengaja nei goe mia di amel e'e. Ara goe kode olune hena. Biasa-biasa hena. Mungkin nae iri, (heheh) masa ata bugis alape, kebare bura lae, aeha samakene artis ibu kota, pe toroka foto ne goe, ata florese?

Foto wahaka, Amel dileta nomor hape goene. Goe diherane, bai persaja hala. Ara kode dore ole. Leta nomor hape goen wahaka, Amel leta permisi. Nae mau balika ne lango gere. Eke direma tukan kae. He goe ne bereun, tobo menu kopi, holo koda geka.

Pas jam 02.00 behe, kame weka dibalik mai kantor gere. Bereun goe Ophik leta mi goe bonceso pake motor goen. Motor ne'e, ne huda bereun ikara retero.

"Kebare kete dewa pe, temene kuliah moe di ama Hamba?," di lare lola, ophik dehe goe nempe. Ara goe gepasomi, goe di bai kenal Amel hala. Ara ama ophik pe persaja hala.

"Moe persaja hala pe suka moen. Bompe!" goe tapamo nempe hena. Ara nae tetap dipersaja ne goe hala.

Pas sampe di kantor, breun goe ikara di dore dehe. Goe kode olun hena. cuek hena.

"Pedewa teti Flores pe, ne artis noone iii? pekemi di Flores pe atadike udik omu ka?," goe denga Ophik gepa nepe, lau kamar mandi ono dai.

Pe goe disamboro mi, "Baru kau tahu? Flores gitu loh!". ophik digekaja. hahahahaha.

KODA WAHAKA GE NEMPE KIA. MUE IKARA BE SAMBORO.