Puasa, Mudik, Balik Hode Lima

Puasa, Mudik, Balik Hode Lima

Oleh: Muhammad Baran Ata Labala 

Ina-ama, kaka-ari, weka kae. Puasa one pi daheka. Rencana tanggal 20 wulan Juni tuun pi. Tite ata watane (muslim) puasa leron 30. Sampe lera lodo, tekan tenu dihala. Hide malu mara, ake koda medon, ake hi-gewai ata. Sembe’e terus, mengaji diaja, tai tadarus Quran sampe rema tukan. 

Lera bauk, magrib, Go peten rae lewo titen-labala, buka puasa rame-rame: tenu es tapo arin, kolak,kebose, hura bedalik, tekan tenu masam-masam.

Kame Pelajar ne Mahasiswa pia Makassar, kalau puasa dahek pe kame rindu balik lewo. Peten nolo puasa rae lewo tanah pe. Tekan tenu sampe taik dibelara te peduli hala. Puasa pia Makassar Sulawesi Selatan... ina-ama, mura-rame. Lera Bauk, dahe magrib, kame temian ne keniki-wai buka puasa. Leron gette sare-sare: Ike kenoren, dagi manu, ewang nawung, teluk, wulu masam-masam. Pokonya aja-aja .

Kalau puasa ono, Kame pelilem televisi Makassar, naranen Makassar TV, tede oras buka puasa. Pas bang magrib, rame-rame ata renu wai gula, es buah ne kue. Hmmm.... onena sare-sena. "Alhamdu...lillah, puasa pi daheka. Minggu waike tite balike lewo, mudik. Hahaha," go reuk marin nempe. 

Pia Makassarl-Bugis lewun pe ata watane omu. Kiwane tou rua hena. Mo bisa bayangkan, puasa pia pe mura rame: Lerra apuka sampe bauka, rema, rema tukan, imsak... tite denga atadiken sembeang.Nei Koda kiring (ceramah), basa kitab Quran (Mengaji)....

Reuk go hae ata kiwan, puasa hala. Rae puasa hala ra, dore buka rame-rame ne kame yang watane hehehe.... Go peten reun goe tou naran Ronal, nae ata Balikpapan-Kalimantan. Kame hama-hama turu mian di secret kampus. Kame mian pe kaje aja-aja. Mahasiswa omu di Universitas Negeri Makassar (UNM). Kebanyakan pe rae ata Bugis, Makassar, Mandar, Toraja, Balikpapan-kalimantan, ne Jawa. Hanya goe mehak hena ata Labala-Lembata NTT. Teman goen mayan goe, “Baran orang Flores”.

Eke dahe, Ronal (agama naen protestan) nowe hogo dore sahur rame-rame. Lerra apuka hojo buka puasa, Ronal yang sibuk, nai hope awe-kue, es buah,-untuk buka puasa. Nae juga dore buka puasa. Padahal leron pe nempe ise tebako, poara-poara.Goe pernah marin nae, “ Ama Ronal e, Tite tekan tenun biasa ara ake sembarang. Ake tenu rokok te bis oto, tempat umum. Tite hormat ata watanen puasa.” Go marin nae juga, kalo di lewo kamen di lembata pe ata watane uhe hena, tapi rae ne kiwane pe rabe tonga-sadan wekiha mela sare.

Ina-ama, opu-maki, kaka-ari, puasa ono pi daheka. Pai tite siap diri sambut Ramadhan. Agama marin, Ramadhan pe wulan senaren, wulan berkah. Ramadhan pe kesempatan tite tula amal melan, ibadah senaren. Supaja iman tite te agama pe nabe belaka, nabe kuata. Nene-Belen tenna naot marin, agama belaka pe lewotanah titen aek nabe breaka, nabe beretana.

Ina-ama, kaka-ari, opu-maki weka kae, Koda goen nempe kia. Mue ikara be tode holo koda bali. Ara go leta, pai tite sambo wulan Ramadhan pi te onek mela sare. Ake une-geni, bekke wekik bei. Toi-tonga wekik maan sare-sare, ti hogo bahe ara rua, ana opu titen murin benure ben tawa gere pe, rae dore ro mela-mela. Tite lewuk tou, labala. Tite ata kaka no ari, tai soba wekik taan dike-dike.
Go nete lima, kai leta maaf mio wekka pe lewo tanah. Doa mio go harap, koda-kiri mio go pile pepa, ti go kette kaan pana laran, ti go pehen kaan gawe ewan. Ia ata lewotanah. Me seba kerja balik geleka lewotanah.

SELAMAT MENYAMBUT BULAN RAMADHAN. MINAL A’IZIN WAL FAIZHIN. MAAF LAHIR-BATHIN…